Thalaite Kan Chep Em?

Mizo thalai thenkhat rilruah hian CHEP nia inhriatna a awm a.‘Mizo Thalaite kan chep lutuk, kan ipik a; engkim min khap sak vek a, thalaite tan nun a zalen lo’ tih thu a ri fo mai a. Hei hian Mizo thalaite hi kan ramah ngei, kan nu leh pa, kan pi leh pute leh kan u leh naute bulah ngei hian kan lo chep ta hle em ni? tih min ngaihtuah tir hial a. Hei hi kei chu ka thukhawchang a ni.

1. Nun zalen pawl tak kan ni lo maw?

A dai zaute leh a hre zau ten an sawi, Mizo nun zia hi a zalen a, kan inpawh a, kan innel an tih hi a dik ka ring. Kan ramah hian thalaite.jpgnaupang an zalen a, hmeichhiate an zalen a; thalai rualte ngat phei chu zalen tak kan ni. Thalaite tuipui apiang he ram hian a ngaihven a; thalaite duh zawng chu kan duh zawng a ni mai lawm ni?Kan duh ang zawng zawngin kan inchei a, tunge min sawisel? Kan duh ang angin kan sam kan sawisa a, tunge min khap sak? Kan duh duh hla kan phuahin kan sa a, tunge min man? Hei lo liam a thalaite zalenna ram hi a tam kher lovang. Hei ai hian zalen leh ta hret ila kan ngaihtuah awm viau lo’ng maw? Mahni fate ngei pawh ngam tawh lo nu leh pa an tam ta em mai!!

2.Kan zalenna rah a ni angem?

Kum 20 chhung lekin Mizo thalaite zingah HIV/AIDS vei mi sang chuang kan awm tih a ni a; WHO tehnaah phei chuan hmuhchhuah pakhat zel phenah hmuhchhuah loh 10 an awm tih a ni lehnghal a. Hei mai hi a ni lo; he ramah hian ruihhlo tih ching thalai rual sing thum vel kan awm an ti lehnghal. Hei hian kan zalen hle tih a pholang lo a nih pawhin chep awzawng lo tih chu a tilang thei ang. Kan zalen lutuk a kan hak a ni, ti ta ila kan uar lutuk angem?

3. Infuihna tur dik a ni em?

Ram changkanga thalaite nun ngaihtuahin Mizo thalaite hi kan chep lutuk a ni tiin thalaite chawktho turin bei ta ila, kan ram tana infuihna dik a ni angem? Nun zalen, mahni duh duh anga nun theihna, thawven hle na society hi kan ngaisang takzet maw? Ram changkanga thalaite thawh rimnate, an taihmaknate, an rinawmnate leh an tumruhnate inkawhhmuh lo hian zalenna, duh duh tih theihna ringawt hi kan sawi uar palh ang tih a hlauhawm lo maw? Kar tluana rim taka an thawh hnua kar tawpa intihhlimna leh engthawlhna hun an hman thin dan chin chiah hi kan lo inkawhhmuh palh mai ang tih ka hlau. Heng thil hi chu sawi hmuh kan ngai lova; kan nunpui reng tawh. Monday atanga Sunday thlengin sapho weekend hman dan hi kan zir a ni ber tawh zawk. Kan chep lutuk, kan zalen lo tih aiin tunlai khawvelah hian thatchhiate tan nun khawchhuahna a awm ta lova; i thawkrim ang u, i taima teh ang, i rinawm ang, tih hi Mizo thalaite zinga vawrh lar chi tak a nih hmel.

4. Khap tamna ram maw?

Ni e, khap tamna ram kan ni. Kan zawm leh zawm loh chu thuhran. A khap pawl chuan lo khap mawlh mawlh mai se, kan insingsa a, kan la fel duak mahna. Mahse, hetia khap a tam em em chunga kan zalen dan en hian hei bak pelh kan duh chuan nunphung pangngai piah deuh a ni mai thei. Nun dan tura nungte tan chuan khapna tam tak hian awmzia a nei lo, a hnawk miah lo. Chuvangin kan ramah hian khap tur thil a tam rih deuh a ni ang. Vantlang zun In-a ek leh damdawi bur a tam thin zia atang mai pawh hian ‘khap’ system hi hman loh theih pawh a ni lo ve bawk a niang.

Zalen leh inngeih tlang taka mitinte kan chenho theih nan ‘Dan’ hi kan mamawh a. Mitinte thattlanna hi a pawimawh ber. Ngaihtuahnaa ‘mahni’ chiah kan indahlen thin avang hian kan nunhona hi a derthawng fo thin. Hetiang zawnga kan thlir chuan thalaite hian intihhlim a, zalen taka (tunaia zalen a) nun ai chuan tuna zalenna kan neih hmanga intodelh tura rim taka hnathawh hi kan mamawh fe zawk. Chu chu he ram siamthatna tur pawh a ni. Mizo thalaite hi kan chep kan tihfo hi a dik takzet maw? Chik miten rawn sawi zawm teh u.

feedback:

This email address is being protected from spambots. You need JavaScript enabled to view it.

Block [navhelper] not found!